Brincadeira formouse a finais dos anos 70 co obxectivo de conservar e difundir a música e o baile tradicionais galegos. Os primeiros membros de Brincadeira procedían de Coros y Danzas de la Sección Femenina de Santiago de Compostela que naceran en 1942 e desapareceron durante a Transición. Deles e delas herdamos instrumentos, traxes e o gusto polo noso baile e a nosa música; pero en Brincadeira démoslle outro enfoque ao feito folclórico: queremos conservar e difundir o sentir da cultura tradicional galega que se viña transmitindo de xeración en xeración.

O repertorio de Brincadeira baséase nun traballo de campo realizado ao longo de toda a xeografía galega e no que se busca como informantes ás persoas de máis idade que aprenderon da tradición oral. Nas súas actuacións, Brincadeira trata de reproducir o máis fielmente posible as pezas de baile e música recollidas que amosan a variedade e a riqueza da nosa cultura. O mesmo ocorre co vestiario, elaborado con tecidos naturais, seguindo modelos e patróns antigos, e coidando as características específicas de cada comarca.

Co fin de difundir o traballo realizado, o grupo vén participando dende sempre en festivais nacionais e internacionais, homenaxes, festas, romarías, mostras, exposicións, congresos, e, por suposto, facendo intercambios con xentes doutras culturas. Neste empeño traballan unhas 30 persoas distribuídas entre o corpo de baile, o grupo de gaiteiros e o grupo de pandereteiras, así como os directores artísticos de cada unha das seccións.

O grupo de Baile e Música Tradicionais Brincadeira desenvolve actualmente as seguintes actividades:

MANTEMENTO DA ESCOLA DE BRINCADEIRA, que comprende:

1.  Clases de baile tradicional para nenos.
2.  Clases de baile tradicional (iniciación) para adultos
3.  Clases de baile tradicional (perfeccionamento) para adultos e xoves
4.  Clases de gaita (iniciación)
5.  Clases de gaita (perfeccionamento)
6.  Clases de instrumentos percutivos
7.  Clases de acordeón
8.   Clases de pandeireta e canto (nenos e nenas)
9.  Clases de iniciación de pandeireta e canto (adultos)
10.  Clases de perfeccionamento de pandeireta e canto (adultos)

A continuación deixamosvos todas as actuacións do Grupo Brincadeira nos últimos 10 anos.